Gezina skryf "Theuns Jordaan op Willowridge se rugbyveld .
09-09-06.

Saterdagaand het ons na Theuns Jordaan en Anton L'Amour gaan luister op Willowridge se rugbyveld. Anders as in die verlede was die gasskool 'n Engelse hoërskool en ek het gewonder of dit 'n vreemde konsert sal wees, gaan Theuns nou Engels praat en sing, of wat?



Gelukkig kon hy dadelik sien dis maar sy gewone aanhangers voor hom en was dit die gewone konsert wat uit 'n mengsel van sy gewilde liedjies en 'n paar ou Engelse treffers bestaan. Soos gewoonlik het Theuns met sy warm stem vir ons gegee waarvoor ons gekom het en al het twee van die luidsprekers op die verhoog ingegee, het die klankmense gou kom planne maak en kon die konsert voortgaan. Anton was effens stil, ek dink hy was dalk moeg aangesien hy die vorige aand 'n ander "gig" gehad het. Dalk bietjie laat gekuier?

By sulke opelugkonserte is dit altyd interessant om na die mense te kyk. Daar is werklik 'n groot verskeidenheid mense wat van Theuns se musiek hou, oues en jonges, mans en vrouens en almal ewe entoesiasties!
Na drie ure van lekker musiek het Theuns weer soos gewoonlik afgekom en met sy bewonderaars gesels, CD's geteken en geglimlag vir foto's.Geduldig en vriendelik, soos ons hom ken en waardeer.
Dankie, Theuns en Anton, vir 'n genotvolle aand.

Musiekgroete

Gezina.
"